دى قصة حب على المنتدى بتاعنا 
تعالوا نشوف التفاصيل ونعيش مع اصحاب القصة
الحلقة الأولى
القصة ان محمد و أسماء
عضوين معانا هنا فى المنتدى
بينهم قصة حب كبيرة واتفقوا على الجواز
والمفروض ان محمد هيفاتح اهلة علشان يروح يتقدم
محمد بيكلم والدتة
محمد/ مساء الفل ياست الكل
الأم / ست الكل ؟ هو انهاردة عيد الأم؟
لا دا لسة بدرى
الام / تبقى عاوز فلوس
محمد / فلوس اية بس احنا بينا الحاجات دى برضه ؟
دا أنا جايبلك مفاجأة
اليوم اللى كنتى مستنياة من زمان
الام / خير
محمد / انا ناويت اتجوز
الام / لووووووووووووووووووووووووووووووووووول
ياألف نهار ابيض يادى السعد يادى الهنا
اخيرا سمعت كلام امك وهتتجوز شوقية بنت اختى
البت بطة دى بنت حلال و.......
محمد / بس بس بس بس بطة اية وفرخة اية
حد جاب سيرة شوقية ؟
الام / نعم نعم ومالها بطة ان شاء الله
اوعى ياواد تكون حاطط عينك على واحدة من بتوع اليومين دول ؟
محمد / متخافيش دى محترمة جدا واهلها ناس طيبين
الام / ودى تبقى مين المزغودة ؟ وعرفتها ازاى ؟
محمد / اسمها اسماء وزميلة ليا فى المنتدى بتاع نجوم
الام / فين ؟
وانت اية اللى وداك الحتت دى ؟
اتاريك بتتأخر برة كل يوم
محمد / بس بس بس بس
اتأخر اية المنتدى دة على النت
الام / نت ؟
هى دى البت اللى بتيجى تاخد الفلوس منك كل شهر ياموكوس ولما أسئلك تقولى فلوس النت ؟
اتاريك عمال تحول منى فلوس أول بأول
محمد / يا حجة افهمينى المنتدى دة مكان على النت بنتجمع فية وبنتكلم مع بعض كلنا
وبنكتب مواضيع كتير انتى مش بتشوفينى بقعد بالساعات على الكمبيوتر ؟
الام / واية يابنى اللى دخل الكمبيوتر فى الموضوع دلوقت ؟
محمد / وبعدين بقى
منا بكون قاعد الوقت دة كلة فى المنتدى معاها
الام / معاها ودى فين ابوها اللى سايبها تخرج وتقعد معاك الوقت دة كلة ؟
محمد / انا بكون هنا فى بيتنا وهى فى بيتها وبنتكلم على النت
الام / وانت شايفها كويسة البت دى ؟
محمد / بقولك محترمة جدا و بتحبنى جدا
دى بتشارك فى كل مواضيعى اللى بكتبها
وكاتبة بحبك فى التوقيع بتاعها
وبطلعني من لعبة السجن اكتر من 5 مرات
الام / سجن ؟ يالاهوى
وانت اية اللى كان دخلك السجن يا واد
ومخبى علينا ؟ وكمان 5 مرات
اكيد اتخانقت فى الشارع بسبب الست هانم
محمد / دى لعبة والله على المنتدى وكل مرة كانت بتيجى وتخرجنى
الام / بتخرجك من السجن
هى محامية ؟ ومالها بطة بنت خالتك ماهى معاها دبلون تجارة قد الدنيا
وست بيت شاطرة ومش بتاعة اقسام ولا سجن
محمد / يادى النيلة انا مش هعرف افهمك حاجة خالص
الام / ان شالله عنك مافهمتنى ياموكوس
انا فاهمة كل حاجة
يلا ياد هاتلى قناة الحكايات علشان اشوف المسلسل
ولما يبقى يجى ابوك يبقى يتصرف معاك
قال مش عاجباة شوقية قال
دة كان الحوار بين محمد ووالدته
والد محمد رجع من الشغل ومحمد بيكلم والدتة علشان تفاتح الوالد فى موضوع جوازة من اسماء
تعالول نشوف اية اللى حصل
محمد / عملتى اية كلمتية ؟
الام / فى اية ؟
محمد / تانى ياحجة هو انا مش قعدت افهمك
الام / اة موضوع جوازك من بطة بنت اختى ؟
محمد / تانى تانى
مش قولنا انسى موضوع بطة دة انا بتكلم عن اسماء
الام / اسماء مين ؟
اة بتاعة الكمبيوتر ؟
محمد / ما انتى فاكرة اهو
يلا بقى خشى كلمية
الام / طيب طيب
بكرة نشوف ست الحسن والجمال
ودخلت تكلم الوالد ومحمد بيتصنت على الباب
الام / بقولك اية ياحج ؟
الأب / اية ؟
الام / محمد ابنك عاوز يفاتحك فى موضوع جوازة
الأب/ تانى الموضوع دة مش قولنا بلاش حكاية بنت اختك دى
محمد فى سرة / الحمد لله
الام / لا مش بطة دة حاطط عينه على واحدة تانية
الاب/ طبعا ابن ابوة بصحيح اكيد حاطط عينة على نورة بنت عمة
محمد فى سرة / يانهار أزرق
الام / نورة ؟
ودى تيجى اية جنب شوقية بنت اختى ؟
دى بطة برقابتها
الاب / بطة اية و وزة اية ؟
بطة دى تدبحيها فى العيد مش تجوزيها لابنك
محمد فى سرة / وبعدين بقى هيقعدوا يتخنقوا كدة ويسيبوا الموضوع بتاعى خالص
الاب / و المحروس بتاعك عاوز يتجوز مين بقى ان شاء الله؟
الام / دى بت اسمها شيماء طلعتلوا من الكمبيوتر
محمد فى سرة / اسماء اسماء وبعدين اية طلعتلوا دى ؟ هى عفريتة ؟
الاب / طلعتلوا منين؟ ناديهولى الفالح ابن الفالحة
ودخل محمد يكلم والدة
محمد / ايوة ياحج
الاب / اية يابنى الكلام الاهبل دة كمبيوتر اية اللى طلعتلك منة دة ؟
محمد / يا حج دى لاطلعت ولانزلت
دى زميلتى فى المنتدى واسمها اسماء
الاب / زميلتك فين ؟
محمد / تانى ؟
المنتدى دة مكان على النت بنتجمع فية وبنكتب مواضيع كتير مع بعض فى السياسة فى الفن فى الشعر وكدة
الاب / وانت اية اللى خلاك تتكلم فى السياسة احنا ناقصين
محمد / ماشى ياحج مش هكتب تانى فى السياسة وهخليها هى كمان متكتبش بس جوزهالى
الاب / هى بتكتب فى السياسة
لية هى صحفية ؟
محمد \ لا ياحج دى لسة طالبة دى بتكتب فى المنتدى
الاب \ يابنى كلمنى عربى منتدى اية بس ؟
محمد / قصدى على النت ياحج
وبعدين انا معجب بيها أوى وبأفكارها ومواضيعها
تصدق ياحج انها عضوة سوبر وانا لسة عضو نشيط
الاب / سوبر ؟
نهارك ازرق هى بتشرب سجاير ؟
وهتلاقيها شربتك سجاير ياشملول
محمد / عضوة سوبر ياحج مش سجاير سوبر يعنى بتشارك بردود كتير فى المنتدى
الاب / يابنى انا بتعصب لما بسمع متدى دى
وبعدين انت مستعجل لية ؟ مش لما تعرفها كويس ؟
محمد / ياحج انا اعرف عنها كل حاجة
اسمها اسماء على
عضوة سوبر من عيلة محترمة والاسم الرمزى قمر الليل
الاب / رمزى ؟ رمزى مين وقمر مين ؟
انت هتزحم لنا الشقة لية يابنى ؟
محمد / ياحج لازحمة ولا حاجة عاوزين نروح نكلم اهلها بقى
الاب / مع انى مش فاهم حاجة بس خلينى وراك نروح نقابلهم
جرى محمد على الكمبيوتر وطلب من اسماء على الياهو انها تحدد
ميعاد مع اهلها
دة كان رد فعل اهل محمد
الموضوع عجبكوا اكمل علشان نشوف اسماء تفاتح اهلها ازاى ؟
[center]مستنيه الردود علشان اعرف رأيكوااكمل ولا كفاية
